БНСУ-ын Кёнги аймгийн Иргэдийн хурлын 11 төлөөлөгч Дархан-Уул
аймагт ажлын айлчлал хийж, Эрүүл мэндийн газар, аймгийн Нэгдсэн эмнэлэгт
зочлов.
Зочид төлөөлөгчдөд Эрүүл мэндийн газрын дарга Б.Батцэнгэл, Нэгдсэн эмнэлгийн ерөнхий эмч Б.Эрдэнэтулга нар Эрүүл мэндийн байгууллагын тухай танилцуулж, НЭМТ-ийн хөдөлгөөн чийрэгжүүлэлтийн төв, Нэгдсэн эмнэлгийн Поликлиникийн тасгийн үйл ажиллагааг үзүүлж сонирхууллаа.
Мөн цаашид яаралтай тусламжийн төвийг орчин үеийн тоног төхөөрөмжтөй машинаар хангах, ЭХО, ургийн зүрхний бичлэгийн аппарат, үений мэс заслын багаж хэрэгсэл, хөдөлгөөн чийрэгжүүлэлтийн тоног төхөөрөмжөөр хангах, эмч мэргэжилтнүүдийг БНСУ-д туршлага судлуулах, зарим төрөлжсөн нарийн мэргэжлийн сургалтад хамруулах зэрэг саналыг зочдод тавив. Мөн нийгмийн эрүүл мэндийн тусламжийг хөгжүүлэх тухай “Эрүүл хот-Эрүүл иргэн” төслийг дэмжих хүсэлтийг төлөөлөгчдөд уламжиллаа.
БНСУ-ын төлөөлөгчид хүн амын эрүүл
мэндийн төлөө хичээл зүтгэл гаргаж, амжилттай ажиллаж байгаа эрүүл
мэндийн салбарынханд талархал илэрхийлээд, цаашид хамтран ажиллаж, эмч
мэргэжилтнүүдийг чадавхижуулах, шаардлагатай эмнэлгийн тусламжийн,
нийгмийн эрүүл мэндийн сургалт сурталчилгааны багаж хэрэгсэл, тоног
төхөөрөмжөөр хангах үйл ажиллагааг дэмжиж ажиллах болно гэдгээ
илэрхийлэв.